Kepi i Gjelbër është kthyer në një nga historitë më të bukura të Kupës së Botës 2026, pasi siguroi për herë të parë kualifikimin në fazën me eliminim direkt, duke u bërë shteti me popullsinë më të vogël që arrin këtë sukses në historinë e turneut.

Përfaqësuesja afrikane e mbylli fazën e grupeve në vendin e dytë, duke grumbulluar pikët e nevojshme falë rezultateve pozitive ndaj Spanjës, Uruguait dhe Arabisë Saudite. Një arritje që ka tërhequr vëmendjen e opinionit sportiv ndërkombëtar.

Suksesi i ekipit lidhet ngushtë me strategjinë e ndjekur prej vitesh nga federata, e cila ka afruar në kombëtare futbollistë me origjinë nga Kepi i Gjelbër, por të lindur dhe formuar në vende si Portugalia, Franca, Holanda dhe Irlanda. Në sfidën vendimtare ndaj Arabisë Saudite, gjashtë titullarë kishin lindur jashtë vendit.

Një nga protagonistët kryesorë të këtij rrugëtimi ka qenë portieri 40-vjeçar Vozinha, i cili është dalluar me pritje vendimtare dhe ka mbajtur portën të paprekur në disa ndeshje. Kontribut të rëndësishëm kanë dhënë edhe Diney Borges dhe Kevin Pina, ky i fundit autor i një goli në turne.

Në fazën me eliminim direkt, Kepi i Gjelbër do të përballet me kampionen në fuqi, Argjentinën, në një sfidë që konsiderohet si një nga përballjet më interesante të këtij raundi.

I renditur në vendin e 64-t në klasifikimin e FIFA-s, Kepi i Gjelbër ka shkruar historinë në Botërorin 2026, duke u shndërruar në surprizën më të madhe të kompeticionit dhe duke konfirmuar se organizimi dhe projekti afatgjatë mund të sfidojnë edhe kombëtaret më të mëdha të futbollit botëror.