Gazetari Klevin Muka ka lexuar një deklaratë në emër të protestuesve, ku u theksua vijimi i protestës deri në largimin e kryeministrit Edi Rama, si dhe u ngritën akuza për tensione dhe përplasje para nisjes së tubimit pranë Parlamentit.

Në deklaratë thuhet se një grup protestuesish, teksa ndodheshin në një lokal pranë Kuvendit, janë përballur me ish-ministrin e Drejtësisë Ulsi Manja dhe persona të tjerë që e shoqëronin. Sipas pretendimeve të artikuluara, nga kjo situatë ka pasur përplasje, ku një protestues është lënduar dhe ka pësuar thyerje të hundës.

Muka ka akuzuar gjithashtu Policinë e Shtetit për ndërhyrje të dhunshme ndaj protestuesve, duke pretenduar përdorim të forcës, shkopinjve të gomës, sprajit dhe gazit lotsjellës, si dhe arrestime të qytetarëve.

Në deklaratën e lexuar prej tij, u tha se protesta do të vijojë deri në largimin e kryeministrit, ndërsa u theksua se çdo përpjekje për ta diskredituar atë nuk do të ndikojë në vazhdimin e saj. Protestuesit deklaruan gjithashtu se do të vijojnë tubimet në mënyrë paqësore.