Tre persona kanë mbetur të plagosur si pasojë e një aksidenti rrugor të regjistruar pasditen e së enjtes në aksin Levan–Tepelenë, pranë fshatit Buzmadh.

Sipas informacioneve paraprake, një automjet tip Volkswagen Touran ka dalë nga rruga pasi drejtuesi dyshohet se ka humbur kontrollin mbi mjetin. Në automjet udhëtonin shoferi, një grua dhe një i mitur.

Të lënduarit janë transportuar me urgjencë në Spitalin Rajonal të Fierit për të marrë ndihmë mjekësore. Burime spitalore bëjnë me dije se gruaja dhe i mituri ndodhen jashtë rrezikut për jetën, ndërsa drejtuesi i automjetit është në gjendje të rëndë dhe po i nënshtrohet një ndërhyrjeje kirurgjikale.

Në vendngjarje kanë mbërritur shërbimet e Policisë, të cilat kanë nisur hetimet për të zbardhur shkaqet dhe rrethanat e aksidentit. Ndërkohë, po punohet edhe për normalizimin e qarkullimit në segmentin rrugor ku ndodhi ngjarja.