Një debat për një vend parkimi në një qendër tregtare në North Lauderdale, Florida, përfundoi në mënyrë tragjike me vrasjen e një veterani 62-vjeçar të ushtrisë amerikane.

Sipas raportimeve, viktima, Bart DiGuglielmo, u përfshi në një konflikt verbal me një grua në parkingun e një dyqani Walmart. Situata u përshkallëzua brenda pak çastesh dhe përfundoi me të shtëna me armë zjarri.

62-vjeçari u transportua me urgjencë në spital, por nuk arriti t’u mbijetojë plagëve të marra. Pas incidentit, gruaja e përfshirë në ngjarje qëndroi në vendngjarje deri në mbërritjen e policisë, duke dorëzuar armën e përdorur. Sipas dëshmitarëve, ajo ndodhej në gjendje të rënduar emocionale, ndërsa hetimet paraprake po shqyrtojnë mundësinë që të ketë vepruar në vetëmbrojtje.

Autoritetet e Qarkut Broward kanë nisur hetimet dhe po analizojnë pamjet e kamerave të sigurisë, si dhe dëshmitë e personave të pranishëm për të zbardhur rrethanat e plota të ngjarjes dhe për të përcaktuar nëse do të ngrihen akuza penale.

Familja e viktimës ka kundërshtuar pretendimet se ai ka shfaqur sjellje agresive, duke theksuar se një mosmarrëveshje e tillë nuk duhej të përfundonte me humbjen e një jete. Rasti ka rikthyer debatin në Shtetet e Bashkuara mbi përdorimin e armëve të zjarrit dhe përshkallëzimin e konflikteve të përditshme në episode fatale.