Një sulm i gjerë me dronë dhe raketa i ndërmarrë nga forcat ruse gjatë natës ka goditur kryeqytetin ukrainas, Kiev, duke shkaktuar të paktën 20 viktima dhe rreth 90 të plagosur. Sipas autoriteteve vendase, bëhet fjalë për sulmin më të madh të kryer deri më tani ndaj kryeqytetit për nga numri i armëve të përdorura.

Mes viktimave raportohet se ka edhe fëmijë, ndërsa një stacion ambulance ishte ndër objektet e goditura. Autoritetet në Kiev kanë shpallur të premten ditë zie në nderim të viktimave.

Sulmet prekën disa zona të qytetit, duke shkaktuar dëme të mëdha në ndërtesa banimi dhe infrastrukturë. Ndër objektet më të goditura ishte një pallat shumëkatësh në lagjen Darnytskyi, ku dy raketa shkaktuan shkatërrime të konsiderueshme. Për shkak të bombardimeve, disa lagje u evakuuan, ndërsa mbi 52 mijë persona, përfshirë rreth 4,500 fëmijë, u strehuan në stacionet e metrosë gjatë natës.

Moska deklaroi se sulmet kishin në shënjestër objekte ushtarake, duke i cilësuar ato si përgjigje ndaj sulmeve ukrainase mbi infrastrukturën civile ruse. Nga ana tjetër, autoritetet ukrainase akuzuan Rusinë për goditje të zonave civile dhe dënuan sulmet ndaj popullsisë.

Situata mbetet e tensionuar, ndërsa autoritetet ukrainase vijojnë operacionet e emergjencës dhe vlerësimin e dëmeve të shkaktuara nga sulmi.