Aksioni i protestuesve është zhvendosur nga oborri i Parlamentit drejt institucioneve të tjera kyçe në kryeqytet, duke sjellë një tjetër valë tensionesh dhe bllokim të qarkullimit rrugor. Një pjesë e tubuesve është drejtuar fillimisht drejt Komisariatit Nr. 4 dhe më pas ka marshuar drejt Ministrisë së Brendshme, ku janë shënuar përplasje të reja me forcat e rendit.

Te Komisariati Nr. 4, ku po mbahen disa prej personave të shoqëruar gjatë paradites, protestuesit kanë bllokuar plotësisht lëvizjen e automjeteve duke u pozicionuar në të dyja anët e rrugës. Në shenjë revolte, ata kanë qëlluar me vezë në drejtim të godinës së policisë, duke kërkuar me thirrje lirimin e menjëhershëm të të ndaluarve.

Situata ka mbetur e ndezur edhe pranë Ministrisë së Brendshme, ku një grup tjetër demonstruesish është përleshur fizikisht me kordonin e sigurisë. Pasi kanë lëshuar thirrje dhe parulla si “deputetë të shitur”, protestuesit kanë shtyrë efektivët e policisë dhe kanë arritur të shkëpusin një pjesë të gardhit metalik që rrethonte institucionin.