Tensionet përpara Parlamentit kanë shënuar një bilanc të ri të lënduarish si pasojë e përplasjeve të dhunshme mes protestuesve dhe forcave të rendit. Nga konfrontimet fizike dhe hedhja e sendeve të forta, deri më tani raportohet për tre efektivë policie dhe tre protestues të plagosur.

Përshkallëzimi i situatës ka ndodhur kur turma ka çarë gardhin metalik të sigurisë, duke u përleshur direkt me kordonin policor. Tre efektivët e lënduar janë tërhequr brenda rrethimit të Kuvendit ku po u jepet ndihma e parë, ndërsa tre protestuesit e plagosur janë transportuar me ambulancë drejt spitalit për trajtim mjekësor.

Për të menaxhuar situatën dhe për të shpërndarë turmën e protestuesve, pranë oborrit të Parlamentit është afruar edhe autoboti me ujë i Policisë së Shtetit.