Tensione dhe incidente janë shënuar këtë të enjte, më 2 korrik, para godinës së Kuvendit, pak minuta para nisjes së seancës plenare.

Një grup qytetarësh është mbledhur sërish në protestë përpara Parlamentit, ku situata është përshkallëzuar pas përplasjeve me forcat e rendit.

Protestuesit kanë hedhur vezë dhe miell në drejtim të makinave të deputetëve, si edhe ndaj efektivëve të policisë. Ata kanë tentuar gjithashtu të çajnë kordonin e sigurisë të vendosur para godinës së Kuvendit.

Gjatë tubimit ka pasur konfrontime të herëpashershme mes protestuesve dhe policisë. Për të ndalur përpjekjet për çarjen e gardhit metalik, efektivët kanë përdorur spraj piperi ndaj qytetarëve që po shtynin drejt barrierës.

Si pasojë e tensioneve, disa protestues janë shoqëruar nga policia.

Sipas raportimeve, një pjesë e deputetëve të Partisë Socialiste kishin hyrë në sallën e Kuvendit përpara nisjes së protestës. Ndërkohë, makina e kryetarit të Kuvendit, Niko Peleshi, është goditur me vezë dhe miell.

Tubimi i sotëm vjen pas protestës së mbajtur të martën, më 30 qershor, dhe është pjesë e protestave që po zhvillohen prej 33 ditësh në Bulevardin “Dëshmorët e Kombit”.

Protestuesit kundërshtojnë planin për investime në Zvërnec dhe kërkojnë dorëheqjen e kryeministrit Edi Rama.

Në protestën e 30 qershorit pati gjithashtu përplasje me forcat e rendit, pas të cilave 31 persona u shoqëruan në polici.