Kuvendi i Shqipërisë do të zhvillojë këtë të enjte, në orën 10:00, seancën e radhës plenare, ndërsa jashtë godinës pritet të mbahet një protestë e thirrur nga pjesëmarrës të tubimit të zhvilluar një ditë më parë para Kryeministrisë.

Gjatë protestës së 32-të, disa nga folësit bënë thirrje për një tubim para Parlamentit, duke kërkuar rrethimin e godinës dhe bllokimin e hyrjes së deputetëve në sallën e seancave. Këto deklarata u shoqëruan me tone të ashpra, ndërsa autoritetet nuk kanë bërë ende të ditur masat që do të merren për garantimin e rendit dhe sigurisë.

Në rendin e ditës së seancës plenare janë parashikuar dy interpelanca. Deputetja Ina Zhupa ka kërkuar interpelancë me ministrin e Turizmit, Kulturës dhe Sportit, Blendi Gonxhja, ndërsa deputeti Klevis Balliu do të zhvillojë një seancë pyetje-përgjigje me ministrin e Drejtësisë, Toni Gogu.

Gjithashtu, deputetët pritet të shqyrtojnë projektrezolutën për vlerësimin e veprimtarisë së Komisionerit për Mbrojtjen nga Diskriminimi për vitin 2025, si dhe disa projektligje që lidhen me ratifikimin e një marrëveshjeje financiare me Bankën Evropiane për Rindërtim dhe Zhvillim (BERZH), ndryshimet në ligjin për organizimin dhe funksionimin e administratës shtetërore, si dhe ndryshimet në ligjin për Shërbimin Informativ Kombëtar.

Seanca do të mbyllet me diskutimet për çështje jashtë rendit të ditës.