Kombëtarja e Shteteve të Bashkuara ka siguruar kualifikimin në fazën e 1/8-ave të Kupës së Botës 2026, pasi triumfoi 2-0 ndaj Bosnjë dhe Hercegovinës në sfidën e zhvilluar në Santa Clara.

Skuadra e drejtuar nga Mauricio Pochettino rikthehet kështu te një fitore në fazën me eliminim direkt të Botërorit për herë të parë që nga edicioni i vitit 2002, kur mposhti Meksikën.

Amerikanët e nisën takimin në sulm dhe në minutën e 20-të panë t’u anulohej një gol i Folarin Balogun për pozicion jashtë loje. Sulmuesi reagoi në fundin e pjesës së parë, duke zhbllokuar rezultatin në minutën e 45-të dhe duke i dhënë avantazhin SHBA-së.

Në pjesën e dytë, Balogun u shndërrua sërish në protagonist, por këtë herë në kahun negativ. Në minutën e 64-t ai u ndëshkua me karton të kuq pas një ndërhyrjeje të rëndë, duke i lënë vendasit me dhjetë futbollistë. Ndërkohë, Bosnjë dhe Hercegovina humbi për shkak dëmtimi kapitenin Edin Džeko, i cili u zëvendësua në minutën e 51-të.

Pavarësisht inferioritetit numerik, SHBA-ja vijoi të ishte skuadra më këmbëngulëse dhe në minutën e 82-të vulosi fitoren. Malik Tillman realizoi një supergol nga goditja e dënimit pranë zonës, duke mposhtur portierin kundërshtar dhe fiksuar rezultatin përfundimtar 2-0.

Me këtë sukses, SHBA-ja avancon në fazën e 1/8-ave, ku më 7 korrik do të përballet me Belgjikën. Nga ana tjetër, Bosnjë dhe Hercegovina i jep fund rrugëtimit të saj në Botërorin 2026.