Belgjika është kombëtarja e radhës që siguron një vend në fazën e 1/8-ave të Kupës së Botës 2026, pasi triumfoi me rezultatin 3-2 ndaj Senegalit në një ndeshje spektakolare, të mbushur me emocione, kthesa dhe tension deri në sekondat e fundit.

Takimi, i zhvilluar në Seattle, nisi të mërkurën në mbrëmje sipas orës shqiptare dhe përfundoi në orët e para të së enjtes, pas plot 132 minutash lojë.

Senegali e mbylli pjesën e parë në avantazh falë golit të Habib Diarra në minutën e 25-të. Afrikanët e thelluan epërsinë menjëherë në fillim të pjesës së dytë, kur Ismaila Sarr realizoi për 2-0, duke i afruar drejt kualifikimit.

Megjithatë, Belgjika reagoi në momentet vendimtare. Romelu Lukaku, i aktivizuar nga stoli, ngushtoi diferencën në minutën e 86-të, ndërsa kapiteni Youri Tielemans barazoi shifrat 2-2 në fundin e kohës së rregullt, duke e çuar sfidën në 30 minutat shtesë.

Edhe koha shtesë dhuroi emocione të shumta, me raste në të dyja portat. Momenti vendimtar erdhi në minutën e 122-të, kur arbitri akordoi një penallti për Belgjikën pas rishikimit të një ndërhyrjeje me sistemin VAR.

Nga pika e bardhë u tregua i saktë Youri Tielemans, i cili mposhti portierin Diaw dhe realizoi golin e tretë për Belgjikën, si edhe të dytin personal në këtë takim.

Në minutat e mbetura Senegali kërkoi me ngulm barazimin dhe pati një mundësi të artë në fund, por nuk arriti ta konkretizonte, duke i lënë belgët të festonin një kualifikim dramatik me përmbysje.

Në fazën e 1/8-ave, Belgjika do të përballet me fituesin e çiftit SHBA – Bosnje dhe Hercegovinë.