Festa për kualifikimin e Meksikës në raundin e 16 më të mirave të Kupës së Botës 2026 është shndërruar në tragjedi, pasi numri i viktimave ka shkuar në katër.

Autoritetet fillimisht konfirmuan vdekjen e tre personave nga asfiksia, mes tyre një 19-vjeçare, një grua 48-vjeçare dhe një burrë 44-vjeçar, të cilët u përfshinë nga turma e madhe e tifozëve që mbushën rrugët e kryeqytetit pas fitores 2-0 ndaj Ekuadorit.

Më vonë, autoritetet njoftuan se një 30-vjeçar humbi jetën pasi pësoi një krizë epileptike gjatë festimeve, duke e çuar në katër numrin e përgjithshëm të viktimave.

Sipas autoriteteve lokale, mbi një milion persona dolën në rrugët e Mexico City, kryesisht pranë monumentit të Engjëllit të Pavarësisë, për të festuar suksesin e kombëtares, e cila siguroi kualifikimin në fazën me eliminim direkt të Kupës së Botës.

Shërbimet e emergjencës ndërhynë në disa zona përgjatë bulevardit Paseo de la Reforma, ku u gjetën persona pa ndjenja. Ekipet mjekësore kryen procedurat e reanimimit dhe i transportuan të lënduarit në spital, por për katër prej tyre nuk ishte e mundur të shpëtohej jeta.

Kryetarja e Bashkisë së Mexico City, Clara Brugada, shprehu ngushëllimet për familjarët e viktimave dhe u bëri thirrje qytetarëve që festimet të zhvillohen me përgjegjësi, kujdes dhe respekt për sigurinë e të gjithëve.

Pas fitores ndaj Ekuadorit, Meksika është kualifikuar në raundin e radhës të Kupës së Botës 2026, ku do të përballet me Anglinë, e cila eliminoi Republikën Demokratike të Kongos me rezultatin 2-1.