KIEV – Të paktën gjashtë persona kanë humbur jetën dhe rreth 50 të tjerë janë plagosur si pasojë e një serie bombardimesh ruse që goditën disa rajone të Ukrainës, sipas autoriteteve lokale.

Në qytetin e Kharkivit, në verilindje të vendit, shtatë bomba të telekomanduara goditën tre lagje të banuara. Si pasojë, një 15-vjeçar humbi jetën, ndërsa 32 persona të tjerë mbetën të plagosur. Kryebashkiaku Igor Terekhov bëri të ditur se sulmet shkaktuan dëme të konsiderueshme në zonat rezidenciale.

Në rajonin e Odesës, një raketë balistike goditi një biznes, duke shkaktuar një zjarr të madh. Sipas guvernatorit Oleh Kiper, dy persona humbën jetën, ndërsa disa të tjerë u plagosën.

Ndërkohë, në rajonin e Khersonit, një dron goditi një minibus, duke vrarë një 18-vjeçare, e cila sipas autoriteteve po shkonte në universitet për t’u regjistruar, si dhe një person tjetër. Nëntë pasagjerë të tjerë mbetën të plagosur.

Një tjetër sulm me dron në të njëjtin rajon goditi një ndërtesë administrative, ku humbi jetën një person dhe dy të tjerë u plagosën.

Sulmet e fundit vijnë në një kohë kur lufta mes Rusisë dhe Ukrainës vazhdon me intensitet në disa fronte, ndërsa bombardimet ajrore ndaj qyteteve ukrainase mbeten të shpeshta.