TIRANË – Protesta e studentëve ka hyrë në ditën e 32-të, ndërsa pjesëmarrësit deklarojnë se nuk janë të mbështetur apo financuar nga asnjë organizatë dhe se kërkesat e tyre mbeten të pandryshuara: largimi i kryeministrit nga qeverisja.

Gjatë protestës së zhvilluar përballë Kuvendit, u raportuan edhe tensione, ku në automjetet e deputetëve u vendosën stikera në formë gjobash, si formë simbolike proteste ndaj mënyrës së parkimit dhe trajtimit të rasteve të ngjashme, sipas studentëve.

Ata theksojnë se aksioni është organizuar nga një grup i vogël studentësh dhe se nuk bëhet fjalë për një lëvizje të financuar apo të mbështetur nga struktura politike apo organizata të tjera.

“Stikerat janë organizuar nga një grup i vogël studentësh, nuk jemi financuar nga asnjë organizatë. I vendosëm te makinat për emigrantët që u gjobitën, ndërkohë deputetët parkojnë në rrugë dhe nuk gjobiten. Ne jemi një grup studentësh që nuk kemi kërkesa të veçuara, nuk ka dialog si në 2018. Kjo zgjidhet vetëm me largimin e kryeministrit Edi Rama”, u shprehën protestuesit.

Ata shtuan se kërkesa e tyre kryesore lidhet me ndryshime të thella politike dhe institucionale, duke theksuar nevojën për një Shqipëri pa korrupsion, me barazi para ligjit dhe me një gjyqësor funksional dhe të pavarur.