Tiranë – Gjykata e Shkallës së Parë të Juridiksionit të Përgjithshëm Tiranë ka vendosur të reduktojë orarin e shërbimit për qytetarët për shkak të temperaturave të larta që kanë përfshirë vendin.

Sipas urdhrit të firmosur nga kryetari i gjykatës, Gerd Hoxha, masa do të jetë në fuqi nga 6 korriku deri më 31 gusht 2026, me synimin për të mbrojtur shëndetin e punonjësve dhe qytetarëve, duke garantuar njëkohësisht vijimësinë dhe cilësinë e shërbimeve.

Gjatë kësaj periudhe, sportelet e gjykatës do të jenë të hapura për publikun nga ora 08:00 deri në 13:00, ndërsa pas këtij orari nuk do të ofrohen shërbime, me përjashtim të rasteve emergjente.

Vendimi, i cili ka hyrë në fuqi më 30 qershor, vjen në kushtet e valës së të nxehtit që pritet të vijojë edhe gjatë muajit korrik.