Tiranë, 1 korrik 2026 – Gjykata Kushtetuese ka vendosur të shfuqizojë vendimin e Gjykatës së Lartë lidhur me masën e sigurisë ndaj kryebashkiakut të Tiranës, Erion Veliaj, duke urdhëruar rishqyrtimin e çështjes nga Gjykata e Lartë.

Sipas vendimit të arsyetuar, Gjykata Kushtetuese vlerëson se Gjykata e Lartë nuk ka analizuar në mënyrë të mjaftueshme nëse masa e sigurisë "Arrest në burg" ishte proporcionale dhe e domosdoshme në raport me të drejtën kushtetuese për t’u zgjedhur dhe për të ushtruar funksionin publik.

Në arsyetim thuhet se nuk është ushtruar një kontroll efektiv për mundësinë e zbatimit të masave më pak kufizuese, si garancia pasurore, të cilat mund të adresonin rreziqet procedurale pa penguar ushtrimin e mandatit të kryetarit të Bashkisë së Tiranës.

Një tjetër element që, sipas Gjykatës Kushtetuese, nuk është trajtuar në mënyrë të plotë nga Gjykata e Lartë lidhet me pretendimin e Veliajt për qëndrimin në kabinën e xhamit gjatë seancave gjyqësore. Sipas kërkuesit, kjo mënyrë paraqitjeje krijonte perceptimin e një personi të rrezikshëm dhe cenonte parimin kushtetues të prezumimit të pafajësisë.

Vendimi zbulon edhe qëndrime të ndryshme mes gjyqtarëve kushtetues. Katër prej tyre kanë vlerësuar se masa e arrestit ishte në vetvete joproporcionale, duke argumentuar se izolimi për një periudhë të gjatë ka penguar ushtrimin e mandatit të fituar nga Veliaj dhe ka prekur edhe të drejtën e qytetarëve për t’u përfaqësuar nga i zgjedhuri i tyre.

Nga ana tjetër, gjyqtari relator Ilir Vokshi votoi kundër shfuqizimit të vendimit, me argumentin se kërkuesi nuk kishte shteruar të gjitha mjetet juridike në lidhje me pretendimet për ushtrimin e mandatit. Ai vlerësoi gjithashtu se qëndrimi në kabinën e xhamit nuk përbën, në vetvete, trajtim degradues nëse respektohen standardet përkatëse.

Ndërkohë, gjyqtarja Sonila Bejtja shprehu rezervat e saj ndaj arsyetimit të gjykatave të zakonshme për ekzistencën e "dyshimit të arsyeshëm", duke argumentuar se nuk ishte individualizuar në mënyrë të mjaftueshme lidhja e Veliajt me veprimet e pretenduara korruptive.

Në vendim përmenden edhe argumentet e paraqitura nga Prokuroria e Posaçme (SPAK), e cila ka mbështetur qëndrimin se provat e administruara tregojnë ekzistencën e një sistemi të organizuar korrupsioni. Sipas SPAK, lirimi i Veliajt do të krijonte rrezik për ndikim mbi provat dhe dëshmitarët, si edhe mundësi largimi për shkak të dënimit të rëndë që parashikojnë akuzat.

Me këtë vendim, çështja i rikthehet Gjykatës së Lartë, e cila do të duhet të shqyrtojë sërish proporcionalitetin e masës së sigurisë, ndikimin e saj mbi ushtrimin e mandatit publik, si dhe pretendimet për kushtet e trajtimit të kërkuesit gjatë procesit gjyqësor.

Vendimi i Gjykatës Kushtetuese është përfundimtar dhe hyn në fuqi pas botimit në Fletoren Zyrtare.