Antwerp, Belgjikë, 1 korrik 2026 – Të paktën gjashtë persona kanë humbur jetën dhe dhjetëra të tjerë janë plagosur pas një zjarri të fuqishëm që përfshiu një ndërtesë 10-katëshe në zonën Linkeroever të qytetit të Antwerpit.

Sipas autoriteteve belge, ndërtesa, ku banonin mbi 200 persona, u përfshi nga flakët paraditen e së mërkurës. Disa prej të lënduarve ndodhen në gjendje të rëndë dhe janë transportuar në spital, ndërsa të tjerë kanë marrë ndihmë mjekësore në vendngjarje.

"Pak para orës 10:00 të mëngjesit, një zjarr shpërtheu në një pallat apartamentesh në August Van der Meydenlaan në Linkeroever. U bë menjëherë e qartë se bëhej fjalë për një zjarr të përmasave të mëdha. Ka disa të plagosur rëndë, disa të plagosur lehtë dhe, fatkeqësisht, edhe viktima. Për momentin, zjarrfikësit po vijojnë kontrollet për të verifikuar nëse ka ende persona brenda ndërtesës", deklaroi Kim Bastien, zëdhënëse e policisë së Antwerpit.

Zjarrfikësit sqaruan se flakët shpërthyen në katin e tetë të godinës dhe jo në katin e dhjetë, siç ishte raportuar fillimisht. Kur ekipet e emergjencës mbërritën në vendngjarje, një pjesë e madhe e ndërtesës ishte mbuluar nga tymi i dendur, duke vështirësuar operacionet e shpëtimit.

Pamjet e publikuara në rrjetet sociale tregojnë një banor që kalon nga ballkoni i apartamentit të tij drejt dritares së një fqinji, në përpjekje për t’i shpëtuar flakëve dhe tymit.

Një zëdhënës i Departamentit të Zjarrfikësve të Antwerpit bëri të ditur se situata mbetet komplekse, por zjarri është izoluar dhe nuk paraqet më rrezik për t’u përhapur në pjesët e tjera të ndërtesës.

"Ky është një operacion shumë kompleks. Zjarri ende nuk është shuar plotësisht, por është vënë nën kontroll dhe nuk mund të përhapet më. Ekipet tona po vazhdojnë evakuimin dhe kërkimet për persona të mbetur brenda godinës", deklaroi ai.

Autoritetet kanë nisur hetimet për të përcaktuar shkaqet e zjarrit, ndërsa operacionet e kërkim-shpëtimit vijojnë.

JUST IN: Multiple people dead, several others seriously injured after an apartment building fire in Antwerp, Belgium. pic.twitter.com/xBSQ5kTbdO

— Scope Report (@ScopeReport_) July 1, 2026