LONDRË – Evropa vazhdon të mbajë dominimin absolut në arenën ndërkombëtare sa i përket fuqisë së dokumenteve të udhëtimit. Sipas edicionit të pestë vjetor të Indeksit Global të Pasaportave (Global Passport Index – GPI) për vitin 2026, nëntë nga dhjetë pasaportat më të forta në botë i përkasin vendeve evropiane, duke lënë Singaporin si të vetmin shtet aziatik që arrin të depërtojë në dhjetëshen e parë.

Ndryshe nga renditjet klasike që maten vetëm me numrin e destinacioneve ku udhëtohet pa vizë, ky indeks aplikon një metodologji më komplekse. Ai vlerëson lirinë e lëvizjes të ndërthurur me faktorë jetikë si: mundësitë për investime, cilësia e jetës, sistemi shëndetësor, siguria, klima, infrastruktura sociale, inovacioni dhe konkurrueshmëria ekonomike.

Sipas kompanisë analizuese Global Citizen Solutions, lidershipi i shteteve evropiane reflekton aftësinë e tyre të lartë për të ofruar një balancë mes lirisë globale të lëvizjes dhe standardeve të shkëlqyera të jetesës.

10 pasaportat më të forta në botë për vitin 2026:

Suedia

Zvicra

Finlanda

Gjermania

Holanda

Danimarka

Irlanda

Mbretëria e Bashkuar

Norvegjia

Singapori

Ndikimi i Brexit dhe rënia e SHBA-së

Raporti specifikon se Mbretëria e Bashkuar arrin të qëndrojë në top-dhjetëshe, por efektet afatgjata të Brexit-it janë tashmë të dukshme. Edhe pse britanikët udhëtojnë pa viza në pjesën më të madhe të botës, humbja e së drejtës automatike për të jetuar, punuar apo hapur biznese në vendet e Bashkimit Evropian ka ulur pikët e saj në vlerësimin e përgjithshëm.

Nga ana tjetër, rënia më drastike është regjistruar nga Shtetet e Bashkuara të Amerikës. Nga vendi i parë që mbanin në vitin 2021, SHBA-ja ka pësuar një zbritje të ndjeshme duke u pozicionuar në vendin e 12-të për vitin 2026. Sipas ekspertëve, ky ngadalësim ka ardhur kryesisht si pasojë e ndryshimeve dhe ngurtësimit të marrëveshjeve dypalëshe për udhëtimet pa viza me disa shtete partnere.