DÜSSELDORF – Kryeministri Edi Rama është përballur me një valë protestash nga komuniteti i emigrantëve shqiptarë gjatë vizitës së tij zyrtare në landin gjerman Nordrhein-Westfalen, ku zhvilloi takime me kryeministrin e këtij rajoni, Hendrik Wüst, në Düsseldorf dhe Bochum.

Një grup i konsiderueshëm bashkatdhetarësh i kanë bërë pritë shefit të qeverisë shqiptare, duke kërkuar dorëheqjen e tij të menjëhershme. Me flamuj kuqezi, pankarta dhe simbole të ndryshme si figura flamingosh, protestuesit kanë bërë thirrje në kor kundër politikave të qeverisë, duke kërkuar shfuqizimin e ligjeve që prekin zonat e mbrojtura.

Ky nuk është rasti i parë që kryeministri përballet me revoltën e diasporës, pasi pak kohë më parë ai u prit me të njëjtat tone protestuese edhe nga emigrantët në Basel të Zvicrës. Organizatorët e tubimit bënë me dije se ky reagim shënon protestën e 32-të radhazi të kësaj lëvizjeje, e cila ka marrë përmasa kombëtare dhe ndërkombëtare.

Sipas përfaqësuesve të tubimit, revolta që nisi fillimisht si një reagim i drejtpërdrejtë ndaj situatës dhe vendimmarrjeve për zonën e Zvërnecit, tashmë është përshkallëzuar në një qëndrim të prerë politik ku kërkohet largimi i kryeministrit. Organizatorët deklaruan se tubimet dhe rezistenca e tyre do të vijojnë si në Shqipëri, ashtu edhe jashtë vendit, deri në përmbushjen e plotë të kërkesave të tyre.