TIRANË – Deputetja e Partisë Demokratike, Jorida Tabaku, ka reaguar ashpër ndaj vendimit të qeverisë për akordimin e një bonusi prej 5 mijë lekësh për pensionistët, duke e cilësuar atë si një "lëmoshë sezonale" që dështon të adresojë rritjen galopante të kostos së jetesës në vend.

Përmes një video-mesazhi të shpërndarë në rrjetet sociale, Tabaku argumentoi se ky bonus i përkohshëm nuk mund të zëvendësojë mungesën e një politike serioze dhe afatgjatë për rritjen e pensioneve. Ajo nënvizoi se të moshuarit në Shqipëri trajtohen me pensionet më të ulëta në rajon, ndërkohë që çmimet e konsumit po arrijnë nivelet e Bashkimit Europian.

"Çmimet në Shqipëri janë sa 90% e mesatares së Bashkimit Europian, ndërkohë që pagat janë vetëm sa 20% e saj. Vetëm produktet e bulmetit, si djathi dhe qumështi, janë 36% më të shtrenjta se mesatarja e BE-së. Në këto kushte, çfarë vlere ka një bonus prej 5 mijë lekësh?" deklaroi deputetja demokrate.

Për të ilustruar atë që ajo e quan "prioritet të gabuar të buxhetit të shtetit", Tabaku bëri një krahasim mes fondit total të alokuar për skemën e pensioneve dhe kostove të projekteve të infrastrukturës me partneritet publik-privat (PPP). Sipas saj, bonusi për rreth 777 mijë pensionistë rëndon buxhetin me afërsisht 35 milionë euro, një shifër kjo dhjetë herë më e ulët se kostoja e koncesionit për aksin rrugor Milot–Balldren, i cili ka arritur në rreth 360 milionë euro.

Në mbyllje të deklaratës së saj, përfaqësuesja e opozitës ngriti shqetësimin edhe për financimin e ulet në sektorët jetikë, siç është shëndetësia, ku Shqipëria shpenzon vetëm 2.9% të Prodhimit të Brendshëm Bruto (PBB). Sipas Tabakut, ndërsa buxheti i shtetit "shërben si strehë për tendera, koncesione dhe falje taksash", shtresa e pensionistëve mbetet e lënë pas dore, pa garantuar një jetesë dinjitoze.