TIRANË – Ekspertiza mjekoligjore pritet të përcaktojë shkakun zyrtar të aksidentit të rëndë të regjistruar në autostradën Tiranë–Durrës, ku humbi jetën drejtuesi i një mjeti të transportit të udhëtarëve, shtetasi Redion Hasimi, 36 vjeç. Burime nga grupi hetimor bëjnë me dije se dyshimi kryesor paraprak është se i riu ka pësuar një atak kardiak ndërsa ishte në timon.

36-vjeçari, i cili kryente pothuajse çdo ditë itinerarin ndërqytetës Tiranë–Berat dhe anasjelltas, humbi jetën gjatë përplasjes. Nga verifikimet dhe këqyrjet e para të kryera në vendngjarje nga Policia Rrugore, ka rezultuar se mjeti nuk po lëvizte me shpejtësi tej normave të lejuara, çka shton dyshimet se humbja e kontrollit ka ardhur si pasojë e një problemi të papritur shëndetësor të drejtuesit.

Trupi i viktimës është transportuar në Institutin e Mjekësisë Ligjore, ku do t’i nënshtrohet autopsisë së plotë për të saktësuar nëse vdekja ka ardhur përpara përplasjes si pasojë e infarktit, apo nga dëmtimet e marra gjatë aksidentit. Ndërkohë, strukturat e policisë po vijojnë veprimet procedurale për zbardhjen e plotë të rrethanave të ngjarjes.