GJKKO shpall të pafajshme kryebashkiaken e Roskovecit, Majlinda Bufi; rrëzohen akuzat e SPAK për krime zgjedhore

TIRANË – Gjykata e Posaçme kundër Korrupsionit dhe Krimit të Organizuar (GJKKO) ka shpallur të pafajshme kryetaren e Bashkisë së Roskovecit, Majlinda Bufi, e cila akuzohej nga Prokuroria e Posaçme (SPAK) për përdorim të funksionit publik në veprimtari politike apo zgjedhore.

Përmes një vendimi të zbardhur këtë të mërkurë, trupa gjykuese e kryesuar nga gjyqtarja Irena Gjoka ka argumentuar se gjatë shqyrtimit gjyqësor "nuk provohet që e pandehura të ketë kryer veprën penale" për të cilën rëndonte akuza.

Në seancën e shpalljes së vendimit ajo nuk ishte e pranishme dhe u përfaqësua nga avokati i saj, Klodian Skënderaj.

Majlinda Bufi u hetua dhe u gjykua në gjendje të lirë nga organet e drejtësisë. Në pretencën e saj, Prokuroria e Posaçme kishte kërkuar shpalljen fajtore të kryebashkiakes dhe dënimin e saj me 1 vit e 6 muaj burgim, me mundësi konvertimi në 2 vite shërbim prove.

Nga ana tjetër, Bufi i ka hedhur poshtë në mënyrë të vazhdueshme këto akuza që prej fillimit të procesit, duke kërkuar pafajësi, kërkesë e cila u pranua sot nga GJKKO.

Bufi u hetua dhe u gjykua në gjendje të lirë. SPAK e akuzoi se në cilësinë e kryetares së bashkisë i kishte kërkuar një qytetari të mos votonte në zgjedhjet vendore të 14 majit 2023 dhe të mos përfshihej në aktivitetet politike të forcave të tjera, duke e kërcënuar.

SPAK raportohet të ketë refuzuar pajtimin me këtë vendim. Prokurorja e çështjes, Dorina Bejko, pritet ta ankimojë vendimin në Apelin e GJKKO.

Kryetarja socialiste e bashkisë së Roskovecit është kallëzuar edhe më herët në SPAK nga Partia Demokratike e Shqipërisë duke e akuzuar për shpërdorim detyre.