POGRADEC – Kanë dalë në dritë detaje të reja tronditëse lidhur me aksidentin tragjik të regjistruar një ditë më parë pranë fshatit Pojskë, ku humbi jetën 32-vjeçari Amarildo Islamaj. Burime zyrtare nga policia bëjnë me dije se automjeti që drejtohej nga viktima rezulton i vjedhur vetëm pak minuta përpara se të ndodhte përplasja fatale.

Sipas verifikimeve hetimore, 32-vjeçari, me origjinë nga Vlora, e ka gjetur mjetin me çelësat në kuadër në fshatin Leshnicë dhe është larguar menjëherë me të. Gjatë lëvizjes me shpejtësi në aksin rrugor Pogradec–Qafë Thanë, ai ka humbur kontrollin e mjetit duke u përfshirë në një aksident të rëndë. Edhe pse u transportua me urgjencë për në spital, i riu nuk u ka mbijetuar dot plagëve të marra.

Komisariati i Policisë Pogradec ka administruar dëshminë e pronarit ligjor të automjetit, i cili kishte denoncuar vjedhjen në momentin që kishte konstatuar mungesën e mjetit. Nga rindërtimi i dinamikës së ngjarjes dhe krahasimi i të dhënave, grupi hetimor ka konfirmuar se autor i vjedhjes ishte pikërisht viktima e aksidentit. Materialet procedurale i kanë kaluar prokurorisë për veprime të mëtejshme.