FLORIDA, SHBA – Një ngjarje e rëndë ka tronditur opinionin publik në Shtetet e Bashkuara, ku një grua 31-vjeçare ka humbur jetën tragjikisht pas sulmit nga një aligator. Ngjarja e rëndë u shënua në ujërat e lumit Econlockhatchee, i cili ndodhet brenda zonës së mbrojtur të Pyllit Shtetëror "Little Big Econ".

Viktima është identifikuar si Brittany Clark. Ajo kishte dalë për një shëtitje në natyrë së bashku me partnerin e saj, Chance Allison. Sipas raportimeve zyrtare nga autoritetet lokale, çifti kishte vendosur të hynte për të notuar në ujërat e cekëta të lumit, moment kur një aligator masiv, rreth 3.7 metra i gjatë, ka dalë papritur duke e sulmuar egërsisht 31-vjeçaren.

Lufta me aligatorin dhe dëshmitë dramatike

Zyrtarë nga Komisioni për Ruajtjen e Peshqve dhe Jetës së Egër të Floridës bënë me dije se gruaja u kafshua rëndë në të dyja duart. Partneri i saj ndërhuri menjëherë në mënyrë heroike për ta shpëtuar, duke luftuar trup me trup me reptilin dhe duke arritur t’i çlironte njërën dorë. Megjithatë, aligatori u kthye në sulm për herë të dytë, duke i shkaktuar asaj plagë të tjera të rënda.

Në telefonatat dramatike të bëra drejt numrit të emergjencës 911, dëshmitarët në vendngjarje e përshkruan situatën si jashtëzakonisht kritike, duke raportuar për dëmtime serioze dhe një humbje masive gjaku.

Reagimi i autoriteteve

Ekipet e emergjencës mjekësore mbërritën me shpejtësi në vendin e ngjarjes, bur pavarësisht përpjekjeve të tyre të menjëhershme për ta mbajtur në jetë, 31-vjeçarja ndërroi jetë gjatë rrugës për në spital.

Pas tragjedisë, autoritetet arritën ta lokalizonin aligatorin agresiv dhe e eliminuan atë, ndërsa trupi i kafshës u mor nga ekspertët si provë materiale për hetimet e mëtejshme.

Sipas mediave amerikane, Brittany Clark njihej si një person mjaft i apasionuar pas natyrës dhe aktiviteteve në ambient të hapur, ndërsa prej vitesh punonte profesionalisht si operatore buldozeri.