MEXICO CITY – Meksika është kualifikuar në fazën e 1/8-ave të Kupës së Botës 2026, pasi mposhti me rezultatin 2-0 Ekuadorin në stadiumin legjendar "Azteca".

Takimi, i planifikuar të niste në orën 03:00 me kohën shqiptare, u shty me një orë për shkak të reshjeve të dendura të shiut dhe aktivitetit të lartë elektrik që përfshiu kryeqytetin meksikan.

Skuadra vendase dominoi sfidën që nga minutat e para dhe zgjidhi gjithçka brenda pjesës së parë. Julian Quinones kaloi Meksikën në avantazh në minutën e 22-të, ndërsa Raul Jimenez dyfishoi shifrat në minutën e 31-të, duke vulosur fitoren dhe kualifikimin.

Me golin e shënuar ndaj Ekuadorit, Jimenez u ngjit në vendin e dytë të golashënuesve më të mirë në historinë e kombëtares meksikane me 48 gola, duke u renditur pas Javier "Chicharito" Hernandez.

Ekuadori e mbylli ndeshjen me dhjetë lojtarë, pasi Piero Hincapie u ndëshkua me karton të kuq në minutat shtesë.

Falë këtij suksesi, Meksika avancon në fazën e 1/8-ave, ku do të përballet me fituesin e çiftit Angli – Republika Demokratike e Kongos.

Meksikanët vijojnë ecurinë perfekte në Botërorin 2026, me katër fitore në po aq ndeshje, ndërsa mbeten skuadra e vetme e turneut që nuk ka pësuar ende asnjë gol.