NEW JERSEY, SHBA – Franca siguroi kualifikimin për në fazën e 1/8-ave të Kupës së Botës 2026, pasi mposhti me rezultatin e pastër 3-0 Suedinë në "MetLife Stadium", duke regjistruar fitoren e katërt radhazi në turne.

Protagonisti i sfidës ishte Kylian Mbappe, i cili realizoi dy gola dhe vendosi një rekord historik, duke u bërë futbollisti i parë që shënon 10 gola në fazën me eliminim direkt të Kupës së Botës.

Skuadra e drejtuar nga Didier Deschamps dominoi takimin që në minutat e para. Mbappe gjeti rrugën e rrjetës në minutën e 21-të, por goli u anulua për pozicion jashtë loje pas ndërhyrjes së VAR-it.

Sulmuesi francez nuk gaboi në fundin e pjesës së parë, kur zhbllokoi rezultatin pas një asisti të Ousmane Dembele, duke i dhënë avantazhin "Gjelave" para pushimit.

Franca e nisi me ritëm edhe pjesën e dytë, ndërsa në minutën e 48-të Bradley Barcola dyfishoi shifrat pas asistit të Michael Olise. Ky i fundit shërbeu edhe për golin e dytë personal të Mbappe në minutën e 74-t, duke vulosur fitoren 3-0 të francezëve.

Me këtë sukses, Franca avancon në fazën e 1/8-ave, ku më 4 korrik do të përballet me Paraguain.

Mbappe pranë rekordit të Messit

Falë dopietës ndaj Suedisë, Kylian Mbappe arriti në kuotën e 18 golave në historinë e Kupës së Botës, vetëm një realizim më pak se Lionel Messi, i cili mban rekordin me 19 gola.

Në edicionin aktual të Botërorit, të dy yjet numërojnë nga gjashtë gola secili, ndërsa Erling Haaland ndjek me pesë realizime.

Përveç kësaj, Mbappe vendosi edhe një rekord tjetër, duke u bërë lojtari me më shumë gola të shënuar në ndeshjet me eliminim direkt të Kupës së Botës, me plot 10 realizime.