Tiranë, 30 qershor 2026 – Sekretari i Përgjithshëm i Partisë Socialiste, Blendi Klosi, është shprehur se qeveria mbetet e hapur për dialog me protestuesit, por jo për të negociuar kërkesën për dorëheqjen e saj.

Në një intervistë televizive, Klosi tha se kryeministri Edi Rama dhe mazhoranca kanë shprehur gatishmërinë për të dëgjuar shqetësimet e qytetarëve dhe për të zhvilluar bisedime për çështjet që lidhen me qeverisjen.

“Së vetmja kërkesë nga Edi Rama dhe qeveria ka qenë: hajde të negociojmë dhe t’ju dëgjojmë për hallet që keni dhe çfarë kërkohet nga qeveria. Ka mundësi që të krijohet një përfaqësi që ditën e parë,” u shpreh Klosi.

Ai theksoi se, sipas tij, nuk mund të ketë negociata kur kërkesa e vetme e protestuesve është dorëheqja e qeverisë.

“Tani ka vetëm një kërkesë, dorëheqjen e qeverisë. Nuk e di si mund të ulet një qeveri kur ata që kërkojnë atë të rrëzohet. Të negociojmë rrëzimin? Grupe që kërkojnë dorëheqjen e qeverisë ka çdo ditë. Kjo nuk do të thotë që qeveria të japë dorëheqjen,” deklaroi ai.

Klosi solli në vëmendje edhe protestat e organizuara ndër vite nga Partia Socialiste kur ishte në opozitë, duke theksuar se protesta është një e drejtë demokratike, por se kërkesa për dorëheqjen e qeverisë nuk nënkupton domosdoshmërisht realizimin e saj.

“Ne kemi bërë më shumë protesta se ata. Ne rrinim aty me ditë e me natë. Edhe Berisha nuk e dha dorëheqjen,” u shpreh Sekretari i Përgjithshëm i PS-së.