Bruksel, 30 qershor 2026 – Komisioni Evropian ka miratuar një paketë financiare me vlerë rreth 3.2 miliardë euro për Malin e Zi, një hap që konsiderohet ndër më të rëndësishmit në procesin e anëtarësimit të vendit në Bashkimin Evropian.

Paketa shoqërohet me nisjen e përgatitjeve për hartimin e Traktatit të Anëtarësimit dhe synon të lehtësojë kalimin e Malit të Zi nga statusi i vendit kandidat në atë të shtetit anëtar.

Presidentja e Komisionit Evropian, Ursula von der Leyen, e cilësoi vendimin si një hap konkret drejt integrimit të plotë të Malit të Zi në BE.

“Po përgatisim Malin e Zi, shtetet anëtare dhe institucionet tona, sepse zgjerimi ka sukses vetëm kur është një projekt i përbashkët evropian, i ndërtuar mbi merita, përkushtim dhe besim”, u shpreh ajo.

Komisionerja për Zgjerim, Marta Kos, theksoi se paketa financiare do të sigurojë një tranzicion sa më të lehtë drejt anëtarësimit.

“Kjo do ta bëjë kalimin e Malit të Zi nga një vend kandidat në një shtet anëtar sa më të lehtë që është e mundur dhe do të garantojë vazhdimësi që nga dita e parë e anëtarësimit”, deklaroi Kos.

Sipas Komisionit Evropian, paketa është ndërtuar mbi parashikimin që Mali i Zi të bëhet pjesë e Bashkimit Evropian në vitin 2028. Ajo është pjesë e negociatave për Kapitullin 33, që lidhet me dispozitat financiare dhe buxhetore, dhe përcakton mënyrën se si vendi do të marrë pjesë në buxhetin e përbashkët të BE-së.

Nëse anëtarësimi realizohet sipas këtij afati, Mali i Zi do të ketë akses të menjëhershëm në fondet e Bashkimit Evropian, ndërsa njëkohësisht do të nisë të kontribuojë në buxhetin e përbashkët, duke shmangur ndërprerjet në financimin e programeve dhe projekteve.

Sipas propozimit të Komisionit Evropian, Mali i Zi mund të përfitojë gjatë periudhës 2028–2034 rreth 1.99 miliardë euro përmes Planit Kombëtar dhe Rajonal të Partneritetit, 277 milionë euro nga Politika e Përbashkët Bujqësore, 592 milionë euro për programet e punëve të brendshme, 37 milionë euro për programet e bashkëpunimit ndërkufitar Interreg, si dhe fonde shtesë nga programe të tjera evropiane.

Autoritetet në Podgoricë e kanë cilësuar vendimin si një sinjal të fortë politik se Bashkimi Evropian e konsideron Malin e Zi kandidatin më të avancuar për t’u bërë anëtari i ardhshëm i bllokut.

Deri më tani, Mali i Zi ka mbyllur përkohësisht 16 nga 33 kapitujt e negociatave të anëtarësimit dhe synon përfundimin e tyre deri në fund të këtij viti, me objektivin për t’u bërë anëtari i 28-të i Bashkimit Evropian në vitin 2028.