Korçë, 30 qershor 2026 – Reshjet e dendura të shiut, të shoqëruara me erë të fortë, kanë shkaktuar probleme në disa zona të qarkut të Korçës, me situatën më problematike të regjistruar në bashkinë e Maliqit.

Sipas raportimeve nga terreni, si pasojë e erës janë rrëzuar disa pemë, ndërsa njëra prej tyre ka rënë mbi një automjet. Deri më tani nuk raportohet për persona të lënduar.

Punonjësit e shërbimeve vendore ndodhen në terren dhe po punojnë për largimin e pemës nga automjeti, si edhe për pastrimin e rrugës dhe rikthimin e qarkullimit normal.

Ndërkohë, në fshatin Orman, në bashkinë e Maliqit, është regjistruar breshër. Reshje breshëri janë raportuar edhe në një fshat të bashkisë Kolonjë.

Autoritetet vendore vijojnë monitorimin e situatës në terren për të evidentuar dëmet e mundshme të shkaktuara nga moti i keq.