Tiranë, 30 qershor 2026 – Shefi i Spitalit Universitar të Traumës, Agustin Suma, ka dhënë detaje mbi gjendjen shëndetësore të të lënduarve nga aksidenti i rëndë i ndodhur pasditen e së martës në autostradën Durrës–Tiranë.

Në një deklaratë për mediat, Suma bëri të ditur se pesë pacientë po i nënshtrohen ndërhyrjeve kirurgjikale, ndërsa dy prej tyre janë shtetas të huaj dhe ndodhen në gjendje të rëndë shëndetësore.

"Pesë pacientë janë aktualisht në sallën e operacionit. Dy prej tyre janë shtetas të huaj dhe paraqiten në gjendje të rëndë shëndetësore", u shpreh ai.

Sipas shefit të Traumës, pesë të plagosur të tjerë janë në gjendje të stabilizuar dhe, bazuar në vlerësimin e ekipit mjekësor, ndodhen jashtë rrezikut për jetën.

Ai konfirmoi gjithashtu se mes të lënduarve ka edhe dy të mitur. Njëri prej tyre është në gjendje të stabilizuar, ndërsa tjetri po i nënshtrohet një ndërhyrjeje kirurgjikale.

Ekipet mjekësore vijojnë trajtimin e të plagosurve, ndërsa autoritetet po hetojnë rrethanat e aksidentit.