PRISHTINË – Një alarm i rremë për bombë është regjistruar mëngjesin e së martës në Stacionin e Autobusëve në Prishtinë, duke shkaktuar panik dhe evakuimin e menjëhershëm të qytetarëve.

Policia e Kosovës bëri të ditur se njoftimi për një mjet të dyshuar shpërthyes u mor rreth orës 08:00. Menjëherë pas sinjalizimit, forcat e rendit vendosën perimetrin e sigurisë, larguan qytetarët nga zona dhe angazhuan njësitë e specializuara për verifikimin e situatës.

Pas kontrolleve të detajuara në të gjithë hapësirën e stacionit, nuk u gjet asnjë mjet apo objekt i dyshimtë, duke konfirmuar se alarmi ishte i rremë. Ky është rasti i dytë brenda pak ditësh që Stacioni i Autobusëve në Prishtinë përballet me kërcënime të tilla fiktive.