Deputetja Marjana Koçeku, e cila vetëm pak kohë më parë vendosi të braktisë radhët e Partisë Socialiste për t’iu bashkuar lëvizjes së protestës, ka humbur edhe pozicionin e saj në strukturat ndërkombëtare të Parlamentit. Ajo është larguar zyrtarisht nga delegacioni i Komitetit Parlamentar të Stabilizim-Asocimit Bashkimi Evropian-Shqipëri.

Lajmi për këtë ndryshim është konfirmuar zyrtarisht nga kryetari i Kuvendit, Niko Peleshi, gjatë seancës plenare të kësaj të marte. Peleshi bëri të ditur se në vend të deputetes Koçeku, si anëtar i ri i këtij komiteti të rëndësishëm parlamentar është caktuar deputeti socialist Erion Malaj.

Ky vendim vjen si rrjedhojë e lëvizjeve të fundit politike të deputetes Koçeku, ku largimi i saj nga grupi parlamentar i shumicës ka sjellë edhe rikonfigurimin e përfaqësimit të mazhorancës në komitetet dhe delegacionet e përbashkëta me jashtë.