Një tragjedi e rëndë ka goditur futbollistin argjentinas Lucas Trejo, i cili aktivizohet në ligën e dytë të Venezuelës. Pas 74 orësh kërkimesh të ethshme nën rrënojat e shkaktuara nga tërmeti i fuqishëm që goditi vendin javën e kaluar, mbrojtësi ka zbuluar trupat e pajetë të bashkëshortes së tij, Yanina, dhe dy fëmijëve të tyre të vegjël, Aarón dhe Ainhoa.

Ngjarja ka ndodhur në zonën bregdetare të Playa Grande në La Guaira, një nga rajonet më të shkatërruara nga lëkundjet sizmike, të cilat cilësohen si më të fortat që kanë prekur Venezuelën në më shumë se një shekull. Në momentin e rënies së tërmetit, Trejo ndodhej në një fazë stërvitore me ekipin e tij, Club Sport Marítimo La Guaira, në kryeqytetin Karakas, çka e bëri të pamundur mbrojtjen e familjes së tij në ato çaste kritike.

Për tre ditë me radhë, futbollisti bëri thirrje të dëshpëruara në rrjetet sociale për ndihmë, duke angazhuar në operacionet e kërkim-shpëtimit jo vetëm forca të specializuara dhe vullnetarë, por edhe kolegë të tij të futbollit. Klubi i tij konfirmoi zyrtarisht lajmin e hidhur përmes një mesazhi ngushëllimi, duke u solidarizuar me dhimbjen e madhe të lojtarit. Sipas familjarëve, futbollisti ndodhet në gjendje të rënduar emocionale, ndërsa banesa e tyre është rrafshuar plotësisht nga lëkundjet shkatërruese.