TIRANË – Një situatë e tensionuar po shoqëron nisjen e seancës plenare të kësaj të marte në Kuvendin e Shqipërisë. Dhjetëra protestues janë grumbulluar që në orët e para të mëngjesit përpara godinës së Parlamentit, përpara orës 10:00 kur ishte njoftuar edhe nisja zyrtare e punimeve.

Për shkak të situatës dhe për të shmangur përplasjet apo bllokimin në hyrje, deputetët e Partisë Socialiste kanë ndryshuar itinerarin e tyre të zakonshëm, duke mbërritur në mjediset e Kuvendit rreth 30 minuta përpara orarit të caktuar.

Jashtë godinës po dëgjohen thirrje të vazhdueshme të protestuesve që kërkojnë dorëheqjen e Kryeministrit Edi Rama, ndërsa situata mbetet nën monitorim. Forca të shumta të Policisë së Shtetit kanë rrethuar perimetrin e institucionit për të garantuar mbarëvajtjen e seancës dhe për të parandaluar incidentet, ndërsa deputetët e tjerë po tentojnë të futen mes thirrjeve të tensionuara të turmës.