Shqipëria renditet ndër vendet me çmimet më të larta të bulmetit në Europë, duke u pozicionuar e treta në kontinent dhe duke kaluar ndjeshëm mesataren e Bashkimit Europian, sipas të dhënave të Eurostat për vitin 2025.

Sipas statistikave, indeksi i çmimeve për qumështin dhe nënproduktet e tij në Shqipëri ka arritur në 135.6, ku mesatarja e BE-së është 100. Ky nivel e vendos vendin në të njëjtin rang me Norvegjinë (135.7), ndërsa Zvicra kryeson listën me 144.

Të dhënat tregojnë një rritje të fortë të çmimeve në katër vitet e fundit. Në vitin 2022, indeksi ishte 112.3, ndërsa në 2025 ai është rritur në 135.6, duke reflektuar një shtrenjtim prej rreth 36% mbi mesataren europiane.

Në krahasim me rajonin, diferencat mbeten të theksuara. Serbia regjistron një indeks prej 107.1, Kroacia 111.2, Mali i Zi 95, Bosnje-Hercegovina 92 dhe Maqedonia e Veriut 89.6, duke qëndruar të gjitha nën nivelin e BE-së.

Ndryshe nga vendet me të ardhura të larta si Zvicra dhe Norvegjia, ku çmimet e larta balancohen nga paga dhe fuqia e lartë blerëse, në Shqipëri rritja e çmimeve ka ndikim më të madh në buxhetet familjare, pasi bulmeti dhe vezët përbëjnë pjesë thelbësore të shportës ushqimore.

Rritja e çmimeve lidhet me disa faktorë strukturorë, përfshirë tkurrjen e numrit të krerëve të blegtorisë, kostot e larta të ushqimit për kafshët, varësinë nga importet dhe rënien e prodhimit vendas. Në të njëjtën kohë, kërkesa është rritur si pasojë e turizmit dhe konsumit të shtuar sezonal.

Emigracioni dhe plakja e popullsisë në zonat rurale kanë ndikuar gjithashtu në tkurrjen e sektorit, i cili gjatë dekadës së fundit është përgjysmuar. Sipas ekspertëve, harmonizimi me standardet e Bashkimit Europian kërkon investime të konsiderueshme, të cilat shumë ferma të vogla nuk arrijnë t’i përballojnë, duke rritur më tej presionin mbi çmimet.

Të dhënat e Eurostat tregojnë gjithashtu se për herë të parë çmimet e ushqimeve në Shqipëri kanë kaluar mesataren e BE-së, duke arritur në 102.9% në vitin 2025, pas një rritjeje të shpejtë nga 85% në 2022.