Trajneri i Gjermanisë, Julian Nagelsmann, ka marrë përgjegjësinë pas eliminimit të kombëtares nga Kupa e Botës 2026, duke deklaruar se është i gatshëm të vazhdojë në detyrë, por se vendimi për të ardhmen i takon drejtuesve të federatës.

Gjermania u eliminua në fazën e 1/16-ave nga Paraguai pas ekzekutimit të penalltive, duke regjistruar një tjetër zhgënjim në një turne madhor dhe duke shtuar pikëpyetjet mbi ecurinë e "Panzerave" në vitet e fundit.

Në analizën e tij pas ndeshjes, Nagelsmann pranoi se skuadra nuk arriti të shfaqte ritmin dhe vendosmërinë e nevojshme në fazën sulmuese.

"Posedimi ynë ishte shumë i ngadaltë. E kontrolluam lojën, por na mungoi vendosmëria dhe prania në zonën kundërshtare. Sidomos në minutat e para nuk fituam asnjë duel në zonën e tyre", u shpreh tekniku gjerman.

Vendimi i tij për të lënë Jamal Musialën në stol dhe për t’i besuar Deniz Undav në sulm është vënë në qendër të kritikave pas eliminimit.

I pyetur për të ardhmen e tij në pankinën e Gjermanisë, Nagelsmann u përgjigj shkurt: "Jam gati të vazhdoj, dhe nëse jo, duhet të ma thonë."

Eliminimi ndaj Paraguait shton presionin mbi trajnerin dhe Federatën Gjermane të Futbollit, teksa kombëtarja vazhdon të mos arrijë rezultatet e pritshme në turnetë e mëdhenj.