ITALI – Vala e fortë e të nxehtit që ka përfshirë Italinë ka shkaktuar dy viktimat e para. Një burrë 86-vjeçar dhe një grua 74-vjeçare kanë humbur jetën në Poliklinikën “San Martino” në Gjenovë, ku ishin të shtruar, si pasojë e temperaturave ekstreme.

Lajmi është konfirmuar nga autoriteti lokal shëndetësor (ASL), i cili bëri të ditur se kushtet e rënda atmosferike kanë ndikuar në përkeqësimin e gjendjes shëndetësore të pacientëve.

Në ditët e fundit të qershorit, një valë e pazakontë të nxehti ka përfshirë një pjesë të madhe të Evropës, duke regjistruar temperatura rekord për këtë periudhë të vitit dhe duke shtuar rrezikun për grupet më të ndjeshme të popullsisë.

Sipas parashikimeve meteorologjike, situata pritet të ndryshojë në ditët në vijim me ardhjen e stuhive dhe reshjeve intensive, të cilat do të sjellin ulje të temperaturave drejt vlerave normale sezonale.

Megjithatë, meteorologët paralajmërojnë se energjia e lartë termike e akumuluar në atmosferë mund të favorizojë fenomene të forta moti, përfshirë stuhi të fuqishme dhe breshër me intensitet të lartë.