DURRËS – Një shtetas slloven është plagosur mbrëmjen e së dielës në zonën e Shkallnurit, në Durrës, pas një konflikti fizik me disa persona ende të paidentifikuar.

Sipas njoftimit të Policisë së Shtetit, ngjarja ka ndodhur rreth orës 21:30. Dyshohet se shtetasi M. M., rreth 45 vjeç, me shtetësi sllovene, i cili paraprakisht mendohet se jetonte në kushte endacake, është përfshirë në një konflikt me disa persona, të cilët janë larguar menjëherë nga vendngjarja.

Si pasojë e konfliktit, 45-vjeçari ka marrë plagë të dyshuara të shkaktuara me mjet prerës. Ai është transportuar në spital, ku po merr ndihmë mjekësore dhe ndodhet nën kujdesin e mjekëve.

Grupi hetimor, nën drejtimin e Prokurorisë, ka nisur veprimet për zbardhjen e plotë të rrethanave të ngjarjes, identifikimin e autorëve të dyshuar dhe dokumentimin ligjor të rastit.

Policia bën të ditur se materialet procedurale do t’i referohen Prokurorisë për vijimin e hetimeve.