MEKSIKË – Një person i panjohur, i cilësuar nga mediat lokale si “Batmani i Lagos de Morenos”, ka shkaktuar debat të gjerë në Meksikë, pasi dyshohet se ndalon dhe ndëshkon persona të dyshuar për vjedhje motoçikletash, duke i lidhur në shtylla të rrugës me shirit ngjitës.

Sipas autoriteteve, ngjarjet janë regjistruar në zonën e Lagos de Morenos, në shtetin e Jalisco-s, ku brenda një periudhe rreth dhjetëditore të paktën pesë persona janë gjetur të lidhur në shtylla përgjatë rrugës.

Pranë tyre, në disa raste janë lënë edhe motoçikletat që dyshohet se ishin të vjedhura, ndërsa në disa situata janë vendosur tabela që i akuzojnë për vjedhje. Fotot e publikuara në rrjetet sociale tregojnë gjithashtu se disa prej tyre kishin mbishkrimin “ratero” (hajdut) në fytyrë, si dhe vizatime të tjera denigruese.

Autoritetet meksikane kanë hapur hetime mbi rastin, duke e konsideruar një formë të vetëgjyqësisë dhe një shkelje të mundshme të ligjit. Sipas policisë, personat e gjetur të lidhur trajtohen si viktima, ndërsa po verifikohen rrethanat e ndalimit të tyre.

Megjithëse në rrjetet sociale disa përdorues e kanë përshkruar figurën misterioze si një “hero” që lufton krimin, autoritetet kanë theksuar se çdo formë e ndëshkimit jashtë procedurave ligjore është e paligjshme dhe e dënueshme.

Identiteti i të ashtuquajturit “Batmani meksikan” mbetet ende i panjohur, ndërsa hetimet vijojnë për të zbuluar personin ose personat e përfshirë në këto incidente që kanë ndezur debat të fortë mbi kufijtë e drejtësisë dhe vetëgjyqësisë në vend.