TIRANË – Eurodeputetja holandeze Anna Strolenberg iu drejtua protestuesve në Tiranë, duke theksuar se kërkesat e tyre përfaqësojnë vlera evropiane dhe duhet të merren seriozisht nga institucionet shqiptare.

Gjatë fjalës së saj, Strolenberg u shpreh se qytetarët po protestojnë për çështje që lidhen drejtpërdrejt me standardet e Bashkimit Evropian, si mbrojtja e natyrës, lufta kundër korrupsionit, transparenca dhe forcimi i demokracisë.

Ajo theksoi gjithashtu se integrimi i Shqipërisë në Bashkimin Evropian kërkon, sipas saj, dëgjim dhe reagim ndaj kërkesave të qytetarëve.

“Jam këtu për t’ju mbështetur. Ajo për të cilën po protestoni janë vlera evropiane: mbrojtja e natyrës, lufta ndaj korrupsionit, transparenca dhe demokracia. Nëse Shqipëria dëshiron të bëhet pjesë e BE-së, Edi Rama duhet të dëgjojë qytetarët”, deklaroi Strolenberg.

Duke iu drejtuar drejtpërdrejt kryeministrit, ajo shtoi: “Edi Rama, a po na dëgjon? Kërkesat janë të qarta: mos u ngatërro me shqiptarët, lufto korrupsionin dhe mbro natyrën”.

Deklaratat e eurodeputetes u pritën me reagime nga protestuesit, në një tubim ku morën pjesë edhe përfaqësues ndërkombëtarë, të cilët po ndjekin nga afër zhvillimet politike në vend.