TIRANË – Një incident është regjistruar gjatë protestës së zhvilluar këtë mbrëmje në kryeqytet, pasi rojet e Universitetit Politeknik hoqën një banderolë të vendosur nga studentët në fasadën e godinës.

Sipas raportimeve nga vendngjarja, ndërhyrja për heqjen e banderolës shkaktoi reagimin e një grupi protestuesish, të cilët u drejtuan me shpejtësi drejt universitetit.

Protestuesit hynë në ambientet dhe shkallët e Universitetit Politeknik, me synimin për të rimarrë banderolën e hequr. Situata krijoi momente tensioni, ndërsa në zonë ishin të pranishme forcat e sigurisë dhe organizatorët e protestës.

Deri më tani nuk raportohet për incidente të rënda apo persona të lënduar, ndërsa mbetet e paqartë nëse banderola është rikthyer apo nëse do të ketë reagim zyrtar nga drejtuesit e universitetit lidhur me ngjarjen.