KUPA E BOTËS – Japonia ka befasuar Brazilin në pjesën e parë të ndeshjes së vlefshme për fazën e 1/32-ave të Kupës së Botës, duke shkuar në pushim me avantazhin minimal 1-0.

Golin e vetëm të 45 minutave të para e realizoi Sano në minutën e 29-të, pas një aksioni individual të shkëlqyer. Mesfushori japonez kaloi mbrojtësit kundërshtarë dhe me një goditje të saktë nga jashtë zonës mposhti portierin Alisson Becker, duke i dhënë epërsinë ekipit të drejtuar nga Hajime Moriyasu.

Brazili, i drejtuar nga Carlo Ancelotti, krijoi disa raste të mira për shënim, por u përball me paraqitjen e shkëlqyer të portierit Zion Suzuki.

Në minutën e 14-të, Matheus Cunha provoi me një goditje nga distanca, por Suzuki reagoi në kohë. Më pas, në minutën e 34-t, Vinícius Júnior tentoi të barazonte, por portieri japonez ishte sërish vendimtar. Edhe një tjetër goditje e Cunhës në minutën e 38-të u neutralizua pa vështirësi nga gardiani i Japonisë.

Pas katër minutave shtesë, arbitri mbylli pjesën e parë me rezultatin Brazil 0-1 Japoni, ndërsa japonezët shkuan në dhomat e zhveshjes me një avantazh të merituar.