TIRANË – Ka nisur marshimi i protestuesve nga sheshi "Skënderbej" drejt godinës së Kryeministrisë, nën thirrjet "Rama, jep dorëheqjen", "Rama në burg, Berisha në burg" dhe "Shqipëri e re".

Protestuesit po lëvizin përgjatë bulevardit "Dëshmorët e Kombit", ndërsa kërkesa kryesore e tubimit mbetet dorëheqja e kryeministrit Edi Rama dhe largimi i klasës aktuale politike.

Sipas organizatorëve, protesta e kësaj të diele shënon ditën e 30-të radhazi të mobilizimit qytetar. Ata kanë deklaruar se protestat do të vijojnë deri në përmbushjen e kërkesave të tyre, duke u bërë thirrje qytetarëve t’u bashkohen tubimeve.

Në protestën e sotme pritet të marrin pjesë edhe disa eurodeputetë, të cilët ndodhen në Shqipëri për të ndjekur nga afër zhvillimet politike dhe situatën në vend.

Organizatorët e cilësojnë këtë marshim si pjesë të një lëvizjeje qytetare që synon ndryshime politike, ndërsa theksojnë se protesta do të vazhdojë në mënyrë paqësore deri në arritjen e objektivave të shpallura.