Një plagosje me armë zjarri është regjistruar këtë të hënë në Pogradec.

Sipas informacioneve paraprake, i plagosur në këmbë ka mbetur Brian Syzo, i cili u transportua menjëherë në Spitalin e Pogradecit, ku po merr ndihmën e nevojshme mjekësore.

Burime paraprake bëjnë me dije se autori i dyshuar i plagosjes është Nikolla Agolli, ndërsa policia ka ngritur pika kontrolli dhe po vijon operacionin për kapjen e tij.

Sipas burimeve, është shoqëruar dhe ndaluar një person, i cili dyshohet se ka qenë së bashku me autorin në momentin e plagosjes. Ndërkohë, uniformat blu janë në kërkim edhe të autorit të dyshuar, si dhe të personave të tjerë që mund të kenë qenë të përfshirë në ngjarje.

Mësohet se pas plagosjes, autori i dyshuar dhe personat që e shoqëronin kanë braktisur automjetin me të cilin lëviznin në zonën e Qafë Thanës dhe më pas janë larguar me një furgon, duke humbur gjurmët. Policia po punon për identifikimin dhe lokalizimin e tyre.

Brian Syzo është një emër i njohur për policinë, pasi ka precedentë penalë. Ai është hetuar më herët për prodhim dhe shitje të lëndëve narkotike, si edhe është përfshirë disa herë në konflikte në qytetin e Pogradecit.

Grupi hetimor ndodhet në vendngjarje dhe po punon për zbardhjen e plotë të rrethanave të plagosjes, ndërsa pritet edhe një reagim zyrtar nga Policia e Shtetit.