ITALI – Një 33-vjeçar shqiptar është arrestuar nga policia italiane në zonën e Padova, pasi gjatë një kontrolli në automjetin e tij u zbulua rreth 1 kilogram kokainë e fshehur në një ndarje të modifikuar.

Sipas mediave italiane, ngjarja ka ndodhur pasi një patrullë policie ka vënë re automjetin që po lëvizte me shpejtësi të lartë në zonën e Limenellës dhe e ka ndaluar për kontroll.

Gjatë verifikimeve, drejtuesi i mjetit është shfaqur i shqetësuar dhe nuk ka dhënë shpjegime të qarta për lëvizjen e tij, çka ka shtuar dyshimet e autoriteteve.

Në kontrollin e detajuar, policia ka konstatuar se konsola qendrore e automjetit ishte e modifikuar, duke zbuluar një mekanizëm elektronik që hapte një hapësirë të fshehtë ku ishte vendosur lënda narkotike.

Sipas hetimeve paraprake, sasia e sekuestruar – rreth 1 kilogram kokainë me pastërti të lartë – vlerësohet mbi 30 mijë euro në tregun me shumicë, ndërsa në tregun me pakicë mund të kapte vlera mbi 100 mijë euro.

33-vjeçari është arrestuar dhe është dërguar në burgun e Padovës, ndërsa ndaj tij kanë nisur edhe procedurat për heqjen e lejes së qëndrimit në Itali.

Autoritetet italiane vijojnë hetimet për të zbuluar nëse ai vepronte i vetëm apo ishte pjesë e një rrjeti më të gjerë trafiku droge.