TIRANË – Gjykata e Apelit ka vendosur të rikthejë pjesërisht shqyrtimin gjyqësor për çështjen e vrasjes së Martin Canit, duke urdhëruar kryerjen e një vlerësimi psikologjik për të përfshirët në dosje.

Sipas vendimit, do të hartohet një raport psikologjik për Mario Përlleshaj, i dyshuar si autor i ngjarjes, si edhe për të miturin e plagosur, Luis Mecja.

Gjykata ka caktuar dy psikologe të cilat do të zhvillojnë takime dhe vlerësime me të miturit e përfshirë, me qëllim analizimin e gjendjes së tyre psikologjike dhe rrethanave që lidhen me ngjarjen.

Ky vendim vjen si pjesë e rivlerësimit të çështjes dhe synon të sqarojë më tej elementët që lidhen me përgjegjësinë penale dhe gjendjen mendore të të përfshirëve.

Seanca e radhës është caktuar për 1 korrik, ku pritet të paraqiten rezultatet e ekspertizës dhe të vijojë shqyrtimi gjyqësor.

Kujtojmë se më herët, autori i dyshuar është dënuar me 16 vite burg.