FRANCË – Vala intensive e të nxehtit që ka përfshirë Francën po ushtron presion të madh mbi sistemin shëndetësor dhe shërbimet funerale, ndërsa autoritetet raportojnë rritje të numrit të viktimave, kryesisht mes personave të moshuar.

Sipas të dhënave zyrtare, rreth 85% e viktimave janë mbi moshën 65-vjeçare, ndërsa numri më i lartë i rasteve është regjistruar në rajonin Île-de-France, ku përfshihet edhe Parisi.

Për shkak të rritjes së vdekjeve, morgjet dhe shtëpitë funerale në kryeqytet janë përballur me mungesë kapacitetesh. Në disa raste, autoritetet kanë nisur transferimin e trupave drejt qyteteve të tjera për të përballuar fluksin.

Sipas raportimeve, në disa zona po shqyrtohet edhe vendosja e ambienteve shtesë dhe kontejnerëve frigoriferikë për ruajtjen e trupave, një masë që ishte përdorur edhe gjatë pandemisë së COVID-19.

Përveç viktimave të lidhura me temperaturat e larta, autoritetet kanë raportuar edhe raste fatale nga mbytjet në lumenj dhe liqene. Viktimat janë kryesisht të rinj të moshës 15 deri në 25 vjeç, të cilët kanë hyrë për t’u larë në zona ku noti është i ndaluar.

Temperaturat në disa rajone të Francës kanë kaluar 40 gradë Celsius, duke detyruar autoritetet të vendosin kufizime për aktivitete publike, kulturore dhe sportive.

Shërbimet e emergjencës u bëjnë thirrje qytetarëve të shmangin ekspozimin në diell gjatë orëve më të nxehta të ditës, të konsumojnë sa më shumë lëngje dhe të tregojnë kujdes të veçantë për të moshuarit, personat e vetmuar dhe grupet e tjera më të rrezikuara nga temperaturat ekstreme.