GREQI – Një ceremoni pagëzimi në qytetin e Volosit u shndërrua në momente paniku, pasi një foshnjë 10-muajshe humbi ndjenjat gjatë shërbesës fetare.

Sipas mediave greke, foshnja kishte qarë gjatë gjithë ceremonisë, por në një moment pushoi së reaguari, ndërsa ndodhej në krahët e priftit dhe ishte vendosur në vaskën e pagëzimit.

Nëna e fëmijës e kuptoi menjëherë se diçka nuk shkonte, kërkoi që foshnja të nxirrej nga uji dhe u përpoq ta kthente në vetëdije, ndërsa të pranishmit u përfshinë nga paniku.

Në vendngjarje mbërriti një ambulancë, ndërsa ekipet e urgjencës i dhanë ndihmën e parë foshnjës. Pas ndërhyrjes mjekësore, fëmija reagoi dhe gjendja e tij u stabilizua, pa qenë e nevojshme të shtrohej në spital.

Ceremonia e pagëzimit u përfundua pak më vonë në prani të personelit shëndetësor.

Ngjarja mori një ngarkesë të veçantë emocionale, pasi foshnja u pagëzua me emrin e babait të saj, i cili kishte ndërruar jetë kur nëna ishte katër muajshe shtatzënë.