SHBA – Kapiteni i kombëtares së Kepit të Gjelbër, Ryan Mendes, është vënë nën hetim pas akuzave për përdhunim, raporton media braziliane Globo. Sipas raportimit, ngjarja e dyshuar ka ndodhur në Auckland të Zelandës së Re, ndërsa policia lokale ka nisur hetimet për rastin.

Sipas padisë së paraqitur, një shtetase braziliane, e cila punonte si përkthyese për ekipin kombëtar të Kepit të Gjelbër gjatë një turneu në Oqeani në muajin mars, pretendon se Mendes ka hyrë në dhomën e saj të hotelit, e ka dhunuar fizikisht dhe më pas e ka përdhunuar.

Globo raporton gjithashtu se disponon fotografi që, sipas pretendimeve të denoncueses, dokumentojnë lëndimet e pësuara gjatë incidentit.

Sipas të njëjtit burim, si Federata e Futbollit të Kepit të Gjelbër ashtu edhe FIFA janë njoftuar për rastin, ndërsa është kërkuar edhe përjashtimi i Mendes nga Kupa e Botës.

Në një reagim për Globo, FIFA deklaroi se është në kontakt me autoritetet e Zelandës së Re dhe se i trajton me seriozitet të plotë të gjitha akuzat për sjellje të papërshtatshme.

"FIFA i merr shumë seriozisht çdo akuzë për sjellje të papërshtatshme dhe ka një procedurë të qartë për raportimin e incidenteve. Organet e pavarura gjyqësore nuk komentojnë mbi akuzat që mund të kenë marrë ose jo, apo nëse një rast është nën hetim. Çdo informacion do të bëhet publik sipas vlerësimit të tyre", thuhet në deklaratë.

Ndërkohë, Globo publikoi edhe një bisedë në WhatsApp, ku një zyrtar i Federatës së Futbollit të Kepit të Gjelbër i shkruan denoncueses se çështja është "problem personal i Ryanit", një përgjigje që, sipas raportimit, është interpretuar si mungesë reagimi institucional.

Deri më tani, Ryan Mendes nuk ka reaguar publikisht ndaj akuzave, ndërsa hetimet nga autoritetet e Zelandës së Re vijojnë.

🚨🇨🇻 EL CAPITÁN DE CABO VERDE FUE DENUNCIADO POR VIOLACIÓNRyan Mendes es investigado en Nueva Zelanda tras haber sido acusado por una traductora brasileña por un hecho ocurrido antes del inicio de la Copa del Mundo.El hecho ocurrió el pasado 27 de marzo, más precisamente… pic.twitter.com/Yv6nBw1ldJ

— Diario Olé (@DiarioOle) June 28, 2026