Tiranë, 29 qershor – Në Tiranë pritet të zhvillohet këtë të diel protesta e 30-të kundër qeverisë, duke shënuar një muaj nga nisja e tubimeve të njëpasnjëshme të organizuara nga qytetarë dhe grupe organizatore.

Sipas organizatorëve, grumbullimi i protestuesve do të nisë në orën 19:00 në Sheshin "Skënderbej", ndërsa më pas pjesëmarrësit do të marshojnë drejt godinës së Kryeministrisë, ku do të zhvillohet tubimi kryesor.

Organizatorët u kanë bërë thirrje qytetarëve nga i gjithë vendi, si edhe shqiptarëve që jetojnë jashtë vendit, t’i bashkohen protestës.

Sipas deklaratave të tyre, kërkesa kryesore mbetet dorëheqja e kryeministrit Edi Rama. Ata kanë bërë të ditur se protestat do të vijojnë edhe në ditët në vazhdim, deri në realizimin e kësaj kërkese.

Autoritetet pritet të marrin masa për garantimin e rendit dhe mbarëvajtjen e tubimit, ndërsa deri tani nuk janë raportuar ndryshime në itinerarin e protestës.